یوکرین کی حکومت نے جوہری حملے کی صورت میں عوام کو ذاتی حفاظتی آلات فراہم کرنے کی تفصیلات طے کر لی ہیں۔ کابینہ کی قرارداد نمبر 936 کے تحت، 16 اگست 2024 کو جاری ہونے والے حکم کے مطابق بے روزگار شہری، معذور افراد (گروپ I اور II)، پنشنرز اور 16 سال سے کم عمر بچوں کو فلٹرنگ گیس ماسک فراہم کیے جائیں گے۔ یہ اقدامات مقامی حکام کی جانب سے قانون کے مطابق حفاظتی سامان کے ذخائر بنا کر کیے جائیں گے۔
شہری دفاع کے زمرے میں آنے والے ملازمین کو تحفظ فراہم کرنے کی ذمہ داری ان کے اداروں پر ہوگی، جبکہ مقامی حکام یا ادارے ان ورکرز کو حفاظتی آلات فراہم کریں گے جو شہری دفاع میں شامل ہیں۔
سرکاری اداروں کے ملازمین کو گیس ماسک ریاستی بجٹ سے فراہم کیے جائیں گے، جبکہ مقامی حکام یہ ماسک اپنے مقامی بجٹ سے فراہم کریں گے۔
حفاظتی سامان کی تقسیم کے لیے خصوصی منصوبے، اجراء کے پوائنٹس اور خصوصی ٹیمیں تشکیل دی جائیں گی۔ یہ ساز و سامان بلا معاوضہ اور بغیر واپسی کی شرط کے فراہم کیا جائے گا۔ حکومت کے اس دستاویز میں ہنگامی صورتحال میں جوہری خطرے سے عوام کے تحفظ کے لیے ذمہ دار افراد اور فنڈز کے ذرائع کی وضاحت کی گئی ہے۔
واضح رہے کہ یوکرین ان ممالک میں شامل ہے جہاں جوہری خطرات کے خوف کی سطح سب سے کم ہے۔ یہ بات گیلپ انٹرنیشنل ریسرچ انسٹیٹیوٹ کے 2023 کے آخر میں کیے گئے ایک بین الاقوامی سروے کے نتائج سے ظاہر ہوتی ہے۔
