روسی حملے کو ناکام بناتے ہوئے یوکرین کا ایف 16 لڑاکا طیارہ گر کر تباہ ہوگیا، یوکرین کی فوج کی جانب سے طیارہ تباہ ہونے کی تصدیق کر دی گئی۔
بین الاقوامی خبر رساں ادارے کی رپورٹ کے مطابق یوکرین کی فوج کا کہنا ہے کہ ایف 16 طیارے کا پائلٹ بھی ہلاک ہوگیا، طیارے کا روسی حملے کو ناکام بنانے کے دوران رابطہ منقطع ہوا تھا۔
یوکرینی فوج نے اپنے بیان میں کہا کہ ایف 16 طیارے نے روس کے 4 کروز میزائل مار گرائے تھے، ایف 16 طیارہ دشمن کے اگلے ہدف کی جانب بڑھ رہا تھا تو اس دوران رابطہ منقطع ہوا۔
امریکی دفاعی حکام کا کہنا ہے کہ ایف 16 طیارے کا تباہ ہونا روسی حملے کا نتیجہ نہیں، طیارے کے تباہ ہونے کی وجہ ممکنہ طور پر پائلٹ کی غلطی ہوسکتی ہے۔
خبر ایجنسی کا کہنا ہے کہ یوکرین کو رواں ماہ ہی امریکا سے ایف 16 لڑاکا طیارے ملے تھے، یوکرینی صدر زیلنسکی نے 4 اگست کو ایف 16 طیارے استعمال کرنے کا اعلان کیا تھا۔
