انڈونیشیا میں آتش فشاں پھٹنے سے 14 افراد ہلاک، 9 لاپتہ

0
35
فوٹو: اے ایف پی

انڈونیشیا میں سیمیرو آتش فشاں کے پھٹنے سے جاوا جزیرے پر کم از کم 14 افراد ہلاک جبکہ درجنوں زخمی ہو گئے۔

جاوا کے سب سے اونچے پہاڑ سیمیرو میں آتش فشاں پھٹ گیا جس کی وجہ سے گرم دھویں اور راکھ نے مشرقی جاوا صوبے کے قریبی دیہاتوں کو لپیٹ میں لیے لیا، لوگ خوف و ہراس کے باعث علاقے چھوڑنے پر مجبور ہوگئے۔

انڈونیشیا کی ڈیزاسٹر ایجنسی نے کہنا ہے کہ کئی بار امدادی ٹیموں کو راکھ تلے دبے متاثرین کو تلاش کرنے کے لیے اپنے ہاتھوں سے کھدائی کرنی پڑی۔

حکام کا کہنا ہے کہ آتش فشاں پھٹنے سے عمارتیں تباہ ہو گئیں اور قریبی ضلع لوماجنگ کے 2 علاقوں کو ملنگ شہر سے ملانے والا ایک اسٹریٹجک پل ٹوٹ گیا۔

بی این پی بی کے عہدیدار نے بتایا گیا کہ 14 افراد ہلاک ہوئے ہیں،جن میں سے9 کی شناخت کی جاچکی ہے جبکہ 56 افراد زخمی ہیں، جن میں سے اکثر جھلس گئے ہیں۔

بی این پی بی نے کہا کہ کم و بیش ایک ہزار 300 افراد کو نکال لیا گیا ہے، جبکہ 9اب بھی لاپتہ ہیں۔

لوماجنگ ضلع کے رہائشی توفیق اسماعیل مرزوقی، جنہوں نے رضاکارانہ طور پر متاثرین کی مدد کی تھی نے کہا کہ ٹوٹے ہوئے پل اور رضاکاروں کے پاس تجربے کی کمی کی وجہ سے ریسکیو کی کوششوں میں ”بہت مشکل” پیش آئی۔

توفیق اسماعیل مرزوقی نے ایک ویڈیو ریکارڈ کی جس میں دیکھا گیا کہ پولیس اور فوجی اہلکارہاتھوں سے لاشیں نکالنے کی کوشش کر رہے ہیں۔

سرکاری خبر رساں ایجنسی انتارا کی رپورٹ کے مطابق، لوماجنگ کے گاؤں کوراہ کوبوکان میں امدادی کارکنوں کو ایک ماں کی لاش ملی جو اپنے مردہ بچے کو اب بھی اٹھائے ہوئے تھی۔

ایک عینی شاہد نے بتایا کہ سمبرولوہ کے علاقے میں گھر اور گاڑیوں مکمل طور پر راکھ تلے دب گئے ہیں جبکہ گرے ہوئے درختوں کی وجہ سے سڑکیں بند ہوگئی ہیں، ایک گائے جسے گاؤں والے سڑک بچانے میں ناکام رہے تھے سڑک کے کنارے پڑی تھی۔

اپنے خاندان سمیت نکلنے والی 31 سالہ مقامی حسنیہ نے بتایا کہ واقعہ بہت اچانک ہوا تھا ‘پہلے میں نے سوچا کہ یہ ایک بم دھماکہ ہے پھر اچانک اندھیرا چھا گیا، جیسے یہ زمین کو تباہ کرنے والا ہو’۔

حسنیہ اپنے خاندان کے ہمراہ علاقہ چھوڑنے میں ناکام رہیں لیکن وہ اپنے ساتھ سرکاری کاغذات کے علاوہ کچھ لے جانے کامیاب نہ ہوئیں۔

موسمیاتی ادارے کے عہدیدران کا کہنا تھا کہ آئندہ 3 روز تک موسلادھار بارش متوقع ہے، جس کی وجہ سے شہریوں کو نکالنے کی کوششوں کومشکلات پیش آسکتی ہیں۔

امدادی عملے کے اہلکار کا کہنا تھا کہ چٹان کے ملبے اور گرم آتش فشاں کی وجہ سے پہلے ہی نقل و حرکت محدود ہے۔

بی این پی بی کے سربراہ کا کہنا تھا کہ وہ تباہ شدہ گھروں کو دوبارہ تعمیر کریں گے جبکہ یہاں کھدائی کرنے والے اور بلڈوزر سمیت ریسکیو کے بھاری آلات بھی لائے جارہے ہیں۔

ایجنسی نے یہ بھی بتایا کہ آتش فشاں پھٹنے سے ریت کی کان میں پھنسے 10 افراد کو نکال کرمحفوظ مقام پر منتقل کردیا گیا ہے۔

ماہرین کے مطابق سیمیرو آتش فشاں 2014 سے پھٹنے کے مرحلے میں ہے، یہاں گرم بادلوں اور لاوے کے بہاؤ کا اخراج شروع ہوگیا ہے، جس کے بعد حکام نے لوگوں کو وارننگ جاری کی ہے کہ اس سے دور رہیں۔

انڈونیشیا کی وزارت نقل و حمل نیکاکہنا ہے کہ آتش فشاں پھٹنے سے پروازوں میں کوئی خلل نہیں پڑا، حالانکہ پائلٹوں کو الرٹ جاری کر دیا گیا ہے کہ وہ راکھ کے گرنے سے بچیں۔

سیمیرو، تین ہزار 600 میٹر سے زیادہ بلند، انڈونیشیا کے تقریباً 130 فعال آتش فشاں میں سے ایک ہے۔

انڈونیشیا ‘پیسیفک رنگ آف فائر’سے گھیرا ہوا ایک انتہائی خطرناک علاقہ ہے، جہاں زمین کی تہہ پر مختلف پلیٹیں آپس میں ملتی ہیں اور بڑی تعداد میں زلزلے اور آتش فشاں پیدا کرتی ہیں۔

جواب چھوڑ دیں

براہ مہربانی اپنی رائے درج کریں!
اپنا نام یہاں درج کریں